Sunnuntai kuvia ja tornionjokilaakson murretta

Hei ja hyvvää sunnuntaita, meilä täälä on pilvinen ja harmaa päivä,

vähän tuuleskellee, mutta lauhaa on.  Puut on melko paljhaat ko ikkunasta kattoo,

onneksi ei kuitenkhaan saa mithään, son hyä, niin saapii tuo Jariki olla joskus kotona, ko ei tartte auraahmaan lähteä.

Muutamat, jokka lukkee tätä minun blogia, toivoivat, että mie kirjottaisin joskus omala

murtheela ja nyt mie sitte päätin kirjottaa.  Helppohan tätä meän kieltä on puhua, meilä ko panhaan hoota joka paikhaan, mutta nykkö mie aloin oikein kirjothaanki, niin kauan aikaa piti miettiä, että kuinka se tullee nyt varmasti oikein?? 

Meilä täälä on menny pyhänseutu aivan hyvin, kahestaan olhaan oltu.

Eilen saunothiin ja katothiin telkkaria, niinko lauantaina ruukathaanki ja tänhään nukuthiin pitkään ja mie tehin meile oikein super hyän aamupalan. Paistoin pekonia ja munia, palan painikheeksi met ryypimä appelsiinimehua, olipa vain hyvvää, aivanko hotellissa olis ollu!

 

Keittihöön mie raakasin eilen toisen tiilen Lompolosta äitin tyköä ja nyt tuossa voipi

polttaa enemän kynttilöitä ja on muuten tukeva alusta.  Ruottista hain ison läjän pitkiä kruununkynttilöitä, net pysyvät hyvin tuossa.  Illala on komean näkönen, ko nuihin pannee tulet, tullee sitä tunnelmaa.

Muuten täälä on aivan samannäköstä ko ennenki, jokku pikku tavarat on saattanheet vaihtaa paikkoja ko mie ruukaan niitä välilä aina laukottaa paikasta toisseen,

se piristää ja se on hyä, son halpaa piristystä ko sitä ei tartte ostaa :) 

Kattokaapa ko minun kaktus on kasvanu!  Mie olen niin tyytyväinen ko olen saanu sen pyssyyn elossa, hyä mie!  Norsunkorva, vai mikä soli, alko mustuthaan lehtiä tässä joku aika sitte ja niin mie viskasin sen roskhiin, viston näköseksi meni.

 

Viime viikola mie tilasin uuen kukan täältä meän omasta kukkakaupasta ja ens viikola se tullee, pittääki muistaa käyä hakemassa se keskiviikkona.  Siittä mie voinki sitte kirjottaa toisela kertaa.

 

Nyt met meinasimma hakea puita ja laittaa uuhniin tulet, ko ulkona tuulee se tullee sisälekki niinkö viileää, häätyy lämmittää.  Päiväkahvikki vois keittää ja ryyppiä net oikein rauhassa ko ei ole kiire minnekhään. 

 

 

Tämmöstä tämä meän murre on, saanähä, saikko sie selvää ja tulikko ymmäretyksi mitä mie höpisin?   Mie rakastan tätä ommaa murretta ja ruukaan aina puhuakki tätä, tämä on hieno asia ja rikhaus, niinko tornionjokilaaksoki kauhniine maiseminheen ja vaaroihneen.

 

Mitäs sie tykkäsit, voisko blogiaki kirjottaa omala murtheela?

 

 

- Sari